ድሕሪ’ቲ ትማሊ ሶኑይ ዘጋጠመ ፍጻመ፡ ብድምር 310 ሰባት ካብ የመን ናብ ጅቡቲ ዝኸዳ ክልተ ጀላቡ ዘጠቓለለ ፍጻመ፡ ክሳብ ሕጂ 48 ሰባት ሞይቶም ምህላዎም ኣብቲ ትካል ሕቡራት ሃገራት ዞባዊ ዳይረክተር ፍራንትዝ ሴሌስቲን ገሊጹ። “እቲ ዘሕዝን ግን ክሳብ ሕጂ ኣስታት 108 ካብቶም ስደተኛታት ጸብጻብ ኣይረኸብናን” ኢሉ።

ብሓለዋ ባሕሪ ጅቡትን ካልኦት ሰበስልጣን ጅቡትን ዝምራሕ ተልእኾ ምድላይን ምድሓንን ይቕጽል ኣሎ።

እቲ ፍጻመ ኣብ ሰሜናዊ ምዕራብ እታ ሃገር ኣብ ዝርከብ ምምሕዳራዊ ኣውራጃ ኮር ኣንጋር ካብ ዝርከብ ገማግም ባሕሪ 150 ሜትሮ ርሒቑ ዘጋጠመ’ዩ። ሓንቲ ጃልባ 100 ሰባት ዝጸዓነት ኮይና ካብዚኦም እቶም 99 ብህይወት ክተርፉ እንከለዉ፡ እታ ካልኣይቲ ድማ 210 ሰባት ጽዒና ነይራ።