መተባብዒ ሽልማት ገንዘብ By Negusse Haile (መንስዓይ)

ናይ 60ታትን 70ታትን ስነ ጥበባውያን ኤርትራ ኣብ ታሪኽ ስነ ጥበብ ሃገርና ብዝለዓለ ኣድናቖት ክዝከር ዝነብር ኣበርክቶ ከም ዝገበርና’ኳ ዘየካትዕ ሓቂ ኢዩ ። እዚ ግን ሕዝቢ ዘይፈልጦ ዘየስተውዓለሉን ድኽመት ኣይነበረናን ማለት ኣየስምዕን ። ከመይ እቲ ዝሓለፍናዮ ሕይወት ብዙሕ ውረድ ደይብ እውን ዝነበሮ ደኣ’ምበር ከምቲ ንብዙሓት ሰባት ዝመስሎም ፣ ዕንባባ እተነስነሶ ምርድዳእን ሓልዮት ሓድሕድን ዝመልኦ ፣ ምቁር ጒዕዞ ጥራሕ ኣይነበረን ። ብካልእ ኣዘራርባ ፣ እተፈላለየ ጸገማት እውን ነይርዎ ኢዩ ። ነዚ ጒዕዞ ሕይወት እዚ ብሓቀኛ መልክዑ ንምግላጽ እምበኣር ብዛዕባቲ ዝነበረ ብልጫታት (ዓወታት) ጥራሕ ዘይኮነስ ብዛዕባቲ ዘጋጥም ዝነበረ ድኽመታት እውን ክዛረብ ኣገዳሲ ኰይኑ ይስምዓኒ ። ንሎሚ ንኣብነት ካብቲ ኣብ 60ታትን ኣብ 70ታትን ዳርጋ ኲላቶም ስነ ጥበባውያን ሃገርና ዘርኣይዎ ድኽመታት ብዛዕባ’ቲ ገና ክሳብ ሎሚ ቅኑዕ ፍታሕ ዘይረኸበ ኰይኑ ዝስምዓኒ ጒዳይ መተባብዒ ሽልማት ገንዘብ ከዘንትወልኩም ኢየ ።

ማሕበራት ትያትርን ጒጅለታት ሙዚቃን ሃገርና ንዘቕርብኦ መድባት ፣ ብዝለዓለ ደረጃ ዝደኽሙሉ ሙዚቀኛታት ኢዮም እንተበልኩ ካብ መንገዲ ሓቂ ዝወጻእኩ ኣይመስለንን ። ኣብ ጊዜ ምርኢት መተባብዒ ገንዘብ ዝሽለሙ ግዳ ድምጻውያን ጥራሕ ኢዮም ። ሕማቕ ባህሊ !!! ካብ ሕጂ ንደሓር ንክእረም ግዳ ለበዋይ ኣቕርብ ። ነዚ ባህሊ እዚ ንምእራም ልዑል ተራ ንክጻወታ ከኣ ብቀዳምነት ንመራኸቢ ብዙሓን ኣዘኻኽር ። ከም ግቡእ እቲ ዝርከብ መተባብዒ ሽልማት ገንዘብ ንኣባላት እታ ማሕበር ወይ ጒጅለ ብማዕርነት ክምቀል ኢዩ ነይሩዎ ። ብተግባር ግን (ኣነ ከም ዝፈልጦ) ኮምኡ ኣይነበረን ። እንታይ ደኣ ነፍስወከፍ ድምጻዊ ከም ናቱ ናይ ውልቁ ጸጋ ኢዩ ዝፈልጦ ። ኣነ ኣብ ማሕበር ትያትር ኣስመራ (ማ.ት.ኣ.) ዋና ጸሓፊ ፣ ኣብ ጒጅለ መርሓባን ከዋኽብቲ መርሓባን ከኣ ሓላፊ ኰይነ እሰርሓሉ ኣብ ዝነበርኩ እዋን ፣ እዚ ገንዘብ እዚ ናይ ሓባር ከም ዝኸውን ንምግባር ብዙሕ ኢየ ጽዒረ ። ዋላ ሓደ ደጋፊ ድምጻዊ ብምስኣን ግዳ ከዓውቶ ኣይከኣልኩን ። ይኹን እምበር ፣ ኣገዳሲ ኰይኑ ስለ ዝስምዓኒ ኣብ ጒጅለ ከዋኽብቲ መርሓባ ነፍስሄር መም. ሰለሙን ገብረ እግዚኣብሔርን ኣቶ ይትባረኽ ገብረ ትንሳኤን ናይዚ ናይ ማዕርነታዊ ረብሓ ሓሳብ ደገፍቲ ምንባሮም እገልጽ ። ኣብ ናይ ተጋድሎ ሓርነት ኤርትራ (ተ.ሓ.ኤ.) ሃገራዊት ክፍሊ ምንቕቓሕ ትያትርን ሙዚቃን ግዳ ብሽልማት መልክዕ ዝኣቱ ገንዘብ ናይ ጒጅለ ማለት ናይ ውድብ ደኣ’ምበር ናይ ድምጻዊ ኣታዊ ይኸውን ኣይነበረን ። ብናተይ ኣረዳድኣ ፣ ቅኑዕ ኣገባብ እምበኣር እዚ ኢዩ ። ክቡራን ኣንበብቲ ፣ ንስኻትኩምከ እንታይ ርእይቶ ትህቡ ?

ኣብ ቀዳማይ ፍርቂ ናይ 70ታት ከዋኽብቲ መርሓባ ብዝብል ስም ኣብ እተፈላለየ ቦታታት ከተማ ኣዲስ ኣበባ ዓቢ ኣድናቆት ዘትረፈ ዕዮታት ኣቕሪብና ። ኣብዚ ጊዜ’ዚ ፊሊፕስ ካምፓኒ ካብ መደብና 12 ደርፍታት መሪጻ 6 ዲስኮ ንምግባር ሓቲታ ። ኣነ ከም ሓላፊ ጒጅለ መጠን ነቶም ድምጻውያን ኮምኡ ንምግባር ተወኪሰዮም ። ነፍስወከፎም ግዳ ፣ „ኣነ ንኣይ ንበይነይ ደኣ’ምበር ኣታዊኡ ንጒጅለ ዝኸውን ዲስኮ ክገብር ፍቓደኛ ኣይኮንኩን“ እትብል መልሲ ሂቡኒ ። ከምዚ ከኣ ንጠለብ ፊሊፕስ ካምፓኒ ብጒጅለ ይኹን ብውልቂ ከይተጠቐምናሉ ተረፍና ። ነዚ ዝመሳሰል  ዘምለጠና ካልእ ዕድላት እውን ነይሩ ። ድምጻውያንና ካብ መደባት ጒጅለና ወጻኢ ብእተፈላለየ መልኽዓት ንዝመጽእ ማዕርነታዊ ረብሓ ክሰማምዑ ዘይምኽኣሎም እምበኣር ብጣዕሚ የሕዝን!!!

ነዚ ሓቂ እዚ ብምግላጽ ንገለ መሳርሕተይ ነበር ድምጻውያን ፣ ቅሬታ ይስምዖም ይኸውን ። ኣነ ግዳ ነዚ „ንኣይ ጥራሕ ይጥዓመኒ“ ዝብል ኣሉታዊ ስምዒት እውን ክዛረበሉ መሪጸ ። ምኽንያቱ ከኣ ንሱ’ውን$ ንከይደግሞ ነዚ ሓዲሽ ወለዶንምጥንቃቕ ኢዩ።ኣብ መደምደምታ$ጽሕፍተይ፣ነቶም$ቅኑዕ ሕልና ዘሎኩም ዜጋታት ፣ ንኣበሃህላይ በዚ ገሊጸዮ ዘሎኹ መንፈስ ክትርድኡለይ እላበወኩም ። ድምጻውያን ሃገርና ብድሕሪ ሕጂ ብግጥሙ ይኹን ብዜማኡ ብቑዕ ደርፍታትን መዛሙርን ንምቕራብ ምእንቲ ክኽእሉ እምበኣር ፣ ድምጻውያንን ሙዚቀኛታትን ንሽልማት ገንዘብ ብማዕርነት ከም ዝማቐልዎ$ ንኽገብሩ ኣዘኻኽር ።

ብዝተረፈ ፣ ከምዚ ዝኣመሰለ ተሓጋጊዝካ ብምስራሕ ሓቢርካ ናይ ምጥቃም ኣገባብ ኣሰራርሓ ዝኽተሉ ብቑዓት ድምጻውያንን$ ሙዚቀኛታትን  መሃዝቲ ዜማን ምስ ዝረክብ ፣ ኣነ’ውን ምስኣታቶም ተረዳዲኤ ብዝተሓተ ኣብ ዓመት ሓደ ጊዜ ሓንቲ ውድባዊ ዘይኮነስ ሃገራዊ ወይ ማሕበራዊ ትሕዝቶ ዘለዋ ብመዝሙር ወይ ብደርፊ መልክዕ እትቐርብ ዓይነታዊት ግጥሚ ከበርክት ፍቓደኛ ምዃነይ$እሕብር$። ንምዃኑ ፣ክቡር ኣንባቢ ክብርቲ ኣንባቢት፣ምስ ግጥምታተይ ሌላዶ ኣሎኩም ? እምበኣርከስ ፣ ካብተን ኣብ ዝሓለፈ ዓመታት ክድረፋን ክዝመራን ዝጸንሓን ዘለዋን ዓይነታውያን ግጥምታተይ ፣ ንምፍላጥ ዝኣክል ናይ ገሊኣተን ኣዝማች$ (ተደጋጋሚ – Ritomello ኣቕርበልኩም ።

1. ኣስላማይ ክስታናይ ፣ ወዲ ቈላደጋ፣

ንምኽሪ ጸላኢ ፣ ኣይትሃቦ ዋጋ ፣

ኣይትሃቦ ዋጋ ፣ ከይትኾንዕዳጋ፣

2. ንወገኖም ኲሉ ዝጭቊኑ፣

ዝደኽሙ’ውን ጥቕሞም ንምርባሕ፣

ኣይትደልን ኢያ ፣ ኤርትራ ናይ ጽባሕ ፣

3.  እንካብ 61 ፣ ካብ ባሕቲ መስከረም ፣

ሰውራና ኣዊጃ ፣ ጸላኢ ክህረም ፣

4. ኲሉ ዝረኤኻ ፣ ዓቢ እምባ ገደም ፣

ንገረና ግዳ ፣ ዛንታና ናይ ቀደም ፣

5. ሩት ፣ ሩት ጓል ስግር ሩባ ፣

ገዛና ኣቲኺ$፣$ብከንደይ ዓጀባ፣

6. ብሰንኪ ድኽነት ፣ ሰኣን ገንዘብ ሕሱም፣

ይዋእ ዘይፈተነ ፣ ጣዕሚ ናይ ጉርጉሱም ፣

7. ውጹዕ ሰራሕተኛ ፣ ኣነ’የ ኰስትሪ ፣

ኲሉ ጐደናታት$፣ከተማ$ዘጽሪ፣

8. ነዛ ተፈታዊት ፣ ሃገረይ ኤርትራ ፣

ክቃለሰላ’የ ፣ ንክትከውን ሓራ ፣

9. እላ ኬራ$ብዙሕ፣$ዓድና$ኤሪትራ፣

ሸዓብና ኣብ ሰላም ፣ ኖሱ ግልንበራ፣

ግኒሙት ዲባቱ ፣ ወግንሓርራ ፣

ኤሪትራ ፣ ደርጊ ኢነብራ !!!

ጽሕፍተይ ኣብ ምድምዳም ፣ ብዛዕባ ግጥምታተይ ብዝርዝር ይኹን ብሓባር ዘሎኩም ርእይቶ ክትህቡኒ ለበዋይ ኣቕርበልኩም ።

መሰል ደራሲ ብሕጊ እተሓለወ ኢዩ

ተፈጸመ